Erasmus+ seminario

Fine de septembro en Herzberg okazis la dua trejnsesio de la dujara Erasmus+ projekto de pola, slovaka kaj germana partneroj. Hotelo Zum Pass estis ideala loko por la dudeko de partoprenantoj por tranokti, manĝi kaj lernadi sub la sama tegmento. La projektgvidantoj: Halina Komar, Peter Balaz, Dorota Rodzianko, Peter Zilvar kaj Zsófia Kóródy kunsidis por verki raporton pri la ĝisnunaj agadoj kaj plani la sekvan jaron, Katalin Kováts kaj Sylvain Lelarge prizorgis la Esperanto-instruadon kaj la aldonajn distrajn programojn por la trejnitoj. Ĉiuj ĝuis la semajnan kunestadon, post la lacigaj studhoroj la promenadojn en la bela ĉirkaŭaĵo, la amuzajn vesperojn, festadon, kaj restis tempo ankaŭ por urborigardado en la Esperanto-urbo kaj por viziti la bibliotekon de la Esperanto-Centro, kie okazis kunveno kun membroj de la loka Esperanto-klubo. La projekt-partoprenantoj povis ĉeesti la fakprelegon de Sabine Fiedler, ĉefpreleganto de la paralele okazantaj Pedagogiaj Tagoj (Torpedo-12), ili vizitis la Esperanto-Centron, kie ili renkontiĝis kun instruistinoj el la pola ĝemelurbo Góra, kaj kun la kursanoj de la GEJ-lingvokurso sub gvido de Michaela Stegmaier. Tiel ili povis akiri kroman fakan klerigadon kaj movadan spertiĝon. Raporto sur la urba hejmpaĝo, fotoalbumo.