Esperanto-Societo Sudharco (Esperanto-Gesellschaft Südharz - EGS)
regiona komunutila asocio kun sidejo en Herzberg am Harz, jam de la 1980aj jaroj regule ofertas Esperanto-lingvokursojn kaj ankaŭ fakajn kaj kulturajn klerigseminariojn.

En aŭtuno 2001 ĝi festis sian 25-jaran jubileon per varia kleriga kaj kultura programo kun regione kaj internacie elstaraj partoprenantoj en la Welf-kastelo kaj en la popola altlernejo (VHS) Osterode am Harz. Jam tiam okazis multaj praktikaj kaj sukcesaj interlaboradoj kun lokaj kaj regionaj politikistoj kaj oficistoj. EGS kunlaboras ankaŭ kun la regiona plukleriga institucio por plenkreskuloj (Ländliche Erwachsenenbildung, LEB), kiu agnoskas la kleriglaboron de EGS kaj ĝiajn lingvokursojn.

EGS ricevis konstantan kontrakton de la urboadministracio de Herzberg por komuna evoluigado de la ’Esperanto-urbo'. Dank’ al la bona kunagado daŭripovaj rezultoj estas jam videblaj ĉie en la urbo.
Ĝi akceptas membrojn ankaŭ el aliaj lokoj, el aliaj landoj. Bv. subteni ĝian agadon per via membriĝo, financa subteno, donacoj.

Servoj, taskoj:

• gvidado de la loka klubo, administrado, flegado de la membraro
• ordigado, listigado de la kolektaĵoj de la granda fakbiblioteko kun arkivo en la Esperanto-Domo
• organizado de lingvokursoj kaj seminarioj, eventoj, memorfestoj, ktp.
• informado pri Esperanto en la urbo kaj en la regiono
• kunlaborado kun la urbo, la urba administracio je la modelo "Herzberg - la Esperanto-urbo"
• zorgado pri Esperanto-instruado en la diversaj lernejoj de Herzberg
• flegado de kontaktoj kun nia pola ĝemelurbo Góra
• regula kontaktado, kunlaboro kun lokaj asocioj, kluboj
• partopreno en regionaj kaj internaciaj eventoj, projektoj

En ĉiu mardo inter 15:30-18h okazas la klubkunvenoj en la biblioteko/seminariejo de la Esperanto-Centro kun lingvolernado, babilado, programplanado, ktp. Krom lingvo-ekzercado eblas ankaŭ aŭskulti prelegojn, partopreni diskutojn kaj spertiĝi pri en- kaj eksterlandaj Esperanto-movadaj aktivecoj, eventoj.

La klerigadon de la klubanoj plenumas kunlaborantoj de EGS kaj de la Esperanto-Centro aŭ porokazaj prelegantoj el Germanio aŭ alilandaj vizitantoj el ĉiuj kontinentoj.
En la programo estas ankaŭ prezentado de interesaj temoj, bildoj, filmoj, ludoj, kantado.
Se estas bona vetero, ni kunvenas en la Esperanto-ĝardeno de ICH.
Ofte ni havas eksterlandajn gastojn, restadas ĉi tie staĝantoj, volontuloj, vizitantoj, kiuj zorgas pri la internacieco de la klubkunvenoj.

Bonvenon al nia marda rondo kaj rekomendu ĝin al viaj geamikoj, konatuloj!

ZOOM-kunvenoj

En ĉiu mardo inter 19-22h ni funkciigas nian Zoom-ĉambron kaj ofertas lernadon, lingvoekzercadon, internacian kontaktadon per virtualaj medioj. La ĉiusemajnaj retkunvenoj traktas variajn temojn al kiuj kontribuas foje-foje alilandaj prelegantoj. La tutjaran liston vi trovas ĉi-tie. La regulan klerigadon ni realigas en kunlaboro kun la Regiona Plenkreskula Kleriginstitucio (Ländliche Erwachsenenbildung in Niedersachsen e.V. , LEB).
Detalojn, alvokojn kaj aliĝeblon ni aperigas ĉe eventaservo.org kaj per nia Facebook-paĝo. Bonvenon al la virtualaj klubkunvenoj!

Temas pri porokazaj eventoj, ofte realigataj per prelegvojaĝantoj, staĝantoj, eksterlandaj gastoj. Ĉu vi ŝatus "kulturvojaĝi" en la mondo? Ni atendas por tiuj specialaj kunvenoj ĉiujn, kiuj ŝatus aŭdi, informiĝi, lerni pri la kulturo (lingvo, literaturo, muziko, arto, ktp.) de aliaj popoloj, interŝanĝi ideojn, pridiskuti kulturtemojn, volas ekkoni la tradiciojn kaj la nuntempan vivon en aliaj landoj.

La prelegoj daŭras ĉ. 60-90 minutojn. La prelegoj estas aŭ en Esperanto aŭ en naciaj lingvoj kun traduko al Esperanto. La kunvenoj estas publikaj, sen enirbileto, sed por specialaj okazoj povas esti petata iom da kotizo. Tiuj eventoj estas realigataj en kunlaboro kun Ländliche Erwachsenenbildung in Niedersachsen e.V. (mallonge LEB).

Lingvokursoj

• ekzercigaj ĉeestaj kursoj
• kelkaj tagoj en E-lingva medio
• ebleco elprovi la lingvon en ĉiutaga vivo
• evoluigo de parolkapablo
• plilarĝigo de vortprovizo, leksiko
• gramatika perfektigo
• renkontiĝo kun aliaj E-parolantoj
• faka, persona helpo de spertaj instruistoj
• lingva prepariĝo antaŭ gravaj E-renkontiĝoj

• je ĉiu nivelo
• laŭ tradiciaj kaj modernaj metodoj
• Cseh-metode
• per modernaj instruhelpiloj
• atentante individuajn bezonojn

• preparkursojn antaŭekzamenajn
• provekzamenan testadon

• Zsófia Kóródy (pli ol 30-jara instrupraktiko, universitata diplomo de ELTE Univ., Budapest, Hungario, pri Esperanto, la angla kaj hungara lingvoj kaj literaturo, rajtigita ekzamenanto de GEI, ILEI kaj KER-ekzamenoj)
• Peter Zilvar (GEA-komsiito por klerigado, studis interlingvistikon ĉe UAM, Poznan, Pollando, rajtigita ekzamenanto de GEI, ILEI kaj KER-ekzamenoj)

Lingvokursoj en 2024
Vizitu Herzberg, ekkonu la Esperanto-urbon kaj ekskursu lernante, ekzercante Esperanton en la belega regiono de la Harz-montaro!