Esperanto-urbo

Esperanto-ĝardeno

Mon, 06 Sep 2010 13:45:00 +0200

Antaŭ la domo de Interkultura Centro Herzberg estis inaŭgurita esperantlingva tabulo, kiu montras al la interna ĝardeno, kie kreskas Esperanto-plantoj: Esperanto-rozo, Esperanto-tulipo kaj Esperanto-klematito. Nova akiraĵo estas rara rozo kun la oficiala nomo: D-ro Zamenhof. Klubanoj kaj vizitantoj de ICH inaŭguris la tabulon kaj havis agrablan kunvenon en la ĝardeno. Jen kelkaj fotoj en nia albumo.

Intensa semajnfina lingvokurso

Fri, 03 Sep 2010 01:19:55 +0200

Lingvokursoj en pluraj niveloj (A1-C1) okazas plurfoje jare en Interkultura Centro Herzberg (ICH). La sekva intensa lernado estos inter 17-19 septembro. La tre efika, speciale ellaborita paroliga metodo taŭgas por komencantoj, daŭrigantoj, konversaciemuloj. Lernado dum farado, ludado, en ĉiutagaj vivsituacioj. La kursojn gvidos Peter Zilvar kaj Zsófia Kóródy. Ne mankos bonhumoro, interesaj programeroj. Uzu la aliĝilon de ICH. Venu kaj lernu kun ni!

Desegnaĵoj pri SALO-5

Fri, 27 Aug 2010 05:29:38 +0200

Jen serio de desegnaĵoj faritaj de Ĵaneta Nowak, ege talenta partopreninto de SALO-5. Ŝi ne nur pretigis sian taglibron sed ankaŭ desegnis la plej gravajn eventojn de la 1-semajna Somera Arbara Lernejo por ĝemelurbaj lernantoj.

Lago-festo

Fri, 20 Aug 2010 01:50:49 +0200

Bela kaj interesa tradicio, unika spektaklo en Herzberg estas la t.n. Juessee-Fest, t.e. lago-festo kun konkurso de paperboatoj. La memfaritaj akvoveturiloj pretiĝas el papero, estas kreitaj laŭ propra fantazio kaj estas bele kolorigitaj, ornamitaj. 1-4 personoj remas en ili kaj konkursas unu kun la aliaj. Ne ĉiuj sukcesas atingi la celon, renversiĝas aŭ sinkas. La evento allogas multajn vizitantojn en ĉiu jaro. Jen kelkaj karnavalecaj bildoj.

Gastoj el Ruslando

Mon, 16 Aug 2010 19:20:02 +0200

Dum mallonga tempo multon vidi, sperti: tio sukcesis al la 15-membra grupo el Ruslando. Per la organiza helpo de Interkultura Centro Herzberg (Zsófia Kóródy, Peter Zilvar kaj pluraj klubanoj) la gastoj ricevis gvidatan urborigardadon, vizitis la Esperanto-Centron (bibliotekon, arkivon), havis komunan vespermanĝon, tranoktis favorkondiĉe, ĝuis bonetosan, bongustan matenmanĝon preparitan de lokaj Esperanto-amikoj, vizitis la Zamenhof-monumenton, la kastelon kaj la Esperanto-ekspozicion. Jam tiu mallonga tempo sufiĉis por interesaj interparoloj, amikiĝo. Karaj geamikoj, havu pluan sukcesan rondvojaĝon en Eŭropo kun multaj belaj travivaĵoj - kaj vizitu nin denove, pli longe! Jen memorfotoj en nia albumo.

SALO-5

Sat, 07 Aug 2010 02:02:07 +0200

Ĝemelurba projekto: 5a renkontiĝo de junuloj el Góra (PL) kaj Herzberg am Harz (DE)
Grupo de 12-17-jaraj Esperanto-lernantoj kun instruistinoj el la pola ĝemelurbo venis al Herzberg/Sieber kaj partoprenis kun samaĝaj germanaj lernejanoj en la jam tradicia Somera Arbara Lernejo. La 1-semajna programo enhavis antaŭtagmezan intensan lingvolernadon en du grupoj (komencantoj kun Zsófia Kóródy, E-parolantoj kun André Müller), dum la posttagmezoj okazis ludoj, babilado, ekskursoj (al la Harz-montaro, Goslar), vizito al kinejo, banejo kaj multe da komunaj aktivecoj. La belaj travivaĵoj, la bona etoso, vesperaj distraj programeroj dum tiu tutsemajna kunestado restos neforgeseblaj kaj pruvas, ke eblas kaj indas organizi tiajn renkontojn, kie Esperanto aperas kiel taŭga komunikilo kaj perilo de amikeco.
Jen la tutsemajna programo (.pdf). Belajn fotojn vi trovas en nia albumo.

Raporto pri OSIEK-konferenco

Wed, 28 Jul 2010 02:27:12 +0200

Unuafoje svingis sur la fasado de la urbodomo de Herzberg/H. (Germanio) grandega, ĉ. 4 m. larĝa Esperanto-flago por saluti 50 gastojn el 12 landoj okaze de la OSIEK-konferenco inter 17-24 julio. Pri la alkvalitaj, interesaj prelegoj, la varia programo bv. legi la raporton de Gian Carlo Fighiera, kiu dum tuta julio restis en Herzberg kaj valore kontribuis al la agado de la Esperanto-Centro. Fotojn vi trovas en la Fotoalbumo.

OSIEK-konferenco 17-23.07 en Herzberg

Sun, 18 Jul 2010 00:17:13 +0200

OSIEK (Organiza Societo de Internaciaj Esperanto-Konferencoj) organizas sian ĉi-jaran konferencon en Herzberg am Harz - la Esperanto-urbo. La 50 partoprenantojn el 13 landoj atendas riĉa programo, fakprelegoj (ekz. de Blanke, Duc Goninaz, Ĵak Le Puil, Karpunina, Dörr, Witkam, Korody, Zilvar) kulturaj eventoj (koncerto, ekspozicio) kaj turismaj ekskursoj al la regiono (Goslar, Braunschwieg, Sieber, ktp. La detalan programon v. trovas per http://esperanto-urbo.de/page.php?pid=91295910
Bonvenon! La unuajn fotojn vi vidas en nia albumo.

4-jara datreveno festata en ICH

Thu, 15 Jul 2010 19:11:57 +0200

En la ĝardeno de Interkultura Centro okazis la kunveno por festi la 4-jaran ekziston de Esperanto-urbo. En la tre agrabla rostadfesto inter ĉ. 20 gastoj ĉeestis ankaŭ urbestro Gerhard Walter, lia sekretariino, klubanoj, geamikoj, vizitantoj. Kiel naskiĝtagan donacon fama E-pentristino, Helga Plötner transdonis belan pentraĵon al urbestro Walter.
Aparte bela momento estis la transdono de diplomo pri honora membreco al Gian Carlo Fighiera, kiu jam la trian fojon staĝas ĉe Interkultura Centro Herzberg por subteni la Esperanto-agadon.
Fotojn vi vidas ĉi tie.

Esperanto-urbo 4-jara!

Wed, 14 Jul 2010 05:14:42 +0200

La urba konsilio antaŭ 4 jaroj, la 11an de julio 2006 decidis pri la aldono de la kromnomo 'la Esperanto-urbo' al Herzberg am Harz. Feliĉan naskiĝtagon! Kore ni dankas al ĉiuj, kiuj per kunagado, helpado subtenas la tre gravan, grandan, multflankan laboron por Esperanto en la urbo.

10-monata staĝado en la Esperanto-urbo

Wed, 30 Jun 2010 03:22:14 +0200

Sukcesajn, eventoplenajn monatojn pasigis en Herzberg am Harz Ma�gorzata Komarnicka, sekretario de ILEI kaj sekretario de ĝia landa sekcio en Pollando. Enkadre de la ’Dumviva Lernado’ programo de EU ŝi ricevis stipendion kiel Grundtvig-asistanto kaj staĝis ĉe Interkultura Centro Herzberg, partoprenis plurajn seminariojn, fakkunvenojn, Pli...

Esperanto-floroj

Sun, 20 Jun 2010 02:04:30 +0200

Unu post la aliaj ekfloradas la specialaj Esperanto-floroj en la ĝardeno de Interkultura Centro Herzberg. Ĉiuj tri plantoj estas oficiale registritaj kun la nomo 'Esperanto', la tulipo estas sufiĉe konata, malpli la Esperanto-klematito kaj la Esperanto-rozo ŝajne estas jam raraĵo, ne estas mendebla ĉe florvendistoj, sed videbla inter la multaj rozoj de la Eŭropa Rozario (rozĝardenego) en Sangerhausen.

Estas ĝojige vidi la bele florantajn plantojn, kiuj per siaj koloroj, odoroj dankas la prizorgadon.

Novaĵleteroj

Fri, 11 Jun 2010 10:39:34 +0200

Novaĵleteroj, cirkuleroj estas nova servo por niaj legantoj, interesiĝantoj pri eventoj en la Esperanto-urbo Herzberg am Harz. En aparta menupunkto "Novaĵleteroj" vi trovas la freŝajn numerojn kun multaj informoj, aktualaĵoj. La numeroj aperas en kronologia ordo. La cirkulerojn ni volonte sendas ankaŭ al privataj retadresoj, Bv. mendi de ni.

Bunta majo

Mon, 31 May 2010 02:34:48 +0200

Buntaj fotoj kaj mallonga retrorigardo al kelkaj belaj eventoj dum majo:
- ekfloris la Esperanto-tulipoj en la ĝardeno de Interkultura Centro Herzberg
- okazis dimanĉa bazar-tago kun surstrataj budoj, varo-prezentadoj
- ni trovis kelkajn interesajn, utilajn objektojn, ekz. por lerneja instruado, en la pulbazaro
- ni plantis printempajn florojn al la Zamenhof-monumento
- Zsofia, Petro kaj Noblina el Koreio pasigis kelkajn belajn horojn en la urba festo (karuseloj, fajroludo....)

Partopreno en kongresoj

Wed, 26 May 2010 01:26:02 +0200

Reprezentantoj de Interkultura Centro Herzberg (ICH), Peter Zilvar kaj Zsófia Kóródy partoprenis la
- Beneluksan Esperanto-Kongreson inter 12-14 majo en Antwerpen, Belgio kaj la
- Francan-Germanan Esperanto-Kongreson inter 21-24 majo en Kaiserslautern, Germanio.
En ambaŭ lokoj estis projekciita la Power Point prezentado: Vivo en la Esperanto-urbo kaj en Kaiserslautern ankaŭ la nova kompilaĵo pri la arkiviga laboro, kolektitaj materialoj kaj unikaĵoj en la biblioteko de ICH.

Kastelmuzea jubileo

Thu, 13 May 2010 04:09:18 +0200

Interkultura Centro Herzberg partoprenas per informtabuloj en la 25-jara jubileo de la muzeo en la Welf-kastelo. La tri tabuloj koncize prezentas la agadon de la Esperanto-Centro en rilato kun la kastelo: 2 tabuloj montras gazetartikolojn, fotojn pri eventoj, kiuj okazis en la kastelo: ekspozicioj, prelegoj, koncertoj, akceptoj de konferencanoj, ktp. en la Kavalira Salono.
La tria tabulo enhavas la Esperantlingvajn broŝurojn, kiuj varbas per fotoj kaj teksto pri la kastelo, ĝia muzeo.
Dum la jubilea programo, akcepto kun bufedo, reprezentantoj de ICH havis la okazon renkonti kun Heinrich Julius von Hannover, la princo, kiu jam ne plu vivas en la kastelo, sed kiu regule vizitas ĝin dum gravaj eventoj. Fotojn vi trovas en la fotoalbumo, inter eventoj.

Studsesio pri varbado, organizado

Sun, 09 May 2010 03:53:05 +0200

Kun aktiva partopreno, interesaj fakprelegoj kaj en bona etoso finiĝis la unua maja kleriga semajnfino en Interkultura Centro Herzberg. La prelego de Felix Zesch: Kiel organizi Esperanto-kursojn kun la postaj diskutoj donis ion novan al ĉiuj partoprenantoj, kiuj espereble utiligos la lernitaĵojn ankaŭ de aliaj prelegantoj kaj ekagos surbaze de la bonaj spertoj de sukcesaj kursorganizantoj.
Jen fotoj pri la eventoj, muziko de Johannes, danco de Noblina, kaj filmo pri la spektita teatraĵo dum la Valpurga nokto en la Harz-montaro.

Bazlerneja EU-projekto

Tue, 04 May 2010 19:13:58 +0200

Enkadre de 2-jara Comenius-projekto ene de la Dumviva lernado programo de EU Nicolai bazlernejo en Herzberg kunlaboris kun partnerlernejoj el Bar Hill (GB) kaj Miskolc (HU). En aprilo okazis la lasta renkonto de la lernejanoj en Herzberg am Harz. Krom lernado, komuna prezentado de kantoj, ludoj, filmoj estis en la 5-taga programo ankaŭ ekskursoj, vizito al muzeoj, urborigardado. La detalan programon vi trovas sub menupunkto Projektoj/Comenius, bildojn inter Fotoj/eventoj kaj foto-raporton ĉi-tie.

Esperanto en la muzeo

Tue, 04 May 2010 00:49:50 +0200

En la kastela muzeo de Herzberg am Harz ekestos konstanta kaj publika informloko sur la supra muzeoplatformo (ĉ. 30 m2), por informi pri Esperanto, GEA, Esperanto-urbo, ktp. La urbo disponigas tiun taŭgan ejon, tamen ni devos ĉion plani, prepari, kaj konstante prizorgi.
Momente tie ankoraŭ okazas la Zamenhof-ekspozicio. Ĝi estas riĉenhava kaj bone akceptita de la respondeculoj.

Studsesio pri varbado, organizado

Thu, 22 Apr 2010 01:31:12 +0200

Klerigsemajnfino 30.04-02.05.2010 en Herzberg pri varb-psikologio, Esperanto-movado, kursorganizado, instruado.
Trejnantoj: Peter Zilvar, Zsófia Kóródy. Invititaj prelegantoj: Gabriella Óturai, Felix Zesch.
Valpurga nokto en la Harz-montaro.
La detalan programon vidu ĉi tie.

Comenius-projekto: granda sukceso

Sun, 18 Apr 2010 04:06:23 +0200

Kun granda sukceso, per bela, spektakla festvespero kun filmoj, kantoj, ludoj, prezentado de la partnerlernejaj infanoj, finiĝis la dujara kunlaboro de tri bazlernejoj: Bar Hill School (Britio), Komlóstet�i Általános Iskola (Miskolc, Hungario) kaj Nicolai-lernejo (Herzberg am Harz, Germanio). Kontentaj gastfamilioj, realigita pedagogia programo, harmonia kunlaboro, multaj travivaĵoj. Amikeco trans limoj per Esperanto! Jen la unuaj fotoj pri la kunveno de Herzberg en nia albumo.

Ekzamenoj en 3 niveloj

Wed, 14 Apr 2010 03:20:36 +0200

UEA/KER-ekzamenoj okazis en B1, B2 kaj C1 nivejoj dum Printempa Semajno Internacia en St. Andreasberg. Entute 12 ekzamenitoj aperis antaŭ la ekzamena komisiono konsistanta el Christof Krick kaj Zsófia Kóródy. Gratulojn!

Klerigmoduloj por instruemuloj

Wed, 14 Apr 2010 02:29:53 +0200

Esperanto-gramatiko, kulturo, literaturo kaj metodiko estis la kvar elekteblaj klerigmoduloj el la oferto de Interkultura Centro Herzberg/Germana Esperanto-Centro dum Printempa Semajno Internacia en St. Andreasberg. Dekoj de interesiĝantoj elektis la specialan fakan trejnadon gvidatan de Peter Zilvar, Christof Krick kaj Zsófia Kóródy.
Daŭrigaj kursoj kaj novaj moduloj okazos dum la jaro laŭ la programo anoncita en la ICH-jarkalendaro 2010.

Pasko - 2010

Fri, 02 Apr 2010 01:38:57 +0200

Al ĉiuj Esperanto-amikoj enlandaj kaj eksterlandaj, al ĉiuj helpintoj, helpantoj, kunlaborantoj de Interkultura Centro Herzberg, al klubanoj, vizitantoj de niaj hejmpaĝoj, interesiĝantoj pri niaj programoj, kursoj, renkontiĝoj, ktp. elkore ni deziras agrablajn festotagojn, belan Paskon. Jen surprizeto kun niaj bondeziroj por vi. Infanoj pri kuniklo (legaĵo el nia arkivo, i.c.e.m n-ro 64, 1992)

UEA/KER-ekzamenoj dum PSI

Tue, 30 Mar 2010 01:45:03 +0200

Aldone al la regulaj lingvaj kursoj dum PSI en St. Andreasberg vi havos ŝancon por trapasi surloke la novan UEA-ekzamenon, kiu estas konforma al la internaciaj normoj laŭ la niveloj B1-B2-C1 de la Komuna Eŭropa Referenckadro (KER). Speciale trejnitaj ekzamenantoj estos je dispono dum PSI por helpi vian prepariĝon, respondi demandojn kaj poste gvidi la ekzamenon. Detalojn pri PSI kaj la ekzamenoferto legu ĉe http://esperanto.de/psi.

Intensa semajnfina kurso

Mon, 29 Mar 2010 01:31:23 +0200

Bonan efikon rezultis la instruado per du instruistoj dum la semajnfina intensa kurso: por varii la taskojn kaj temojn, prizorgi la okupiĝon pri diversnivelaj kursanoj, en bona harmonio dividis la kursgvidadon Zsófia Kóródy kaj Malgosia Komarnicka. La partoprenintoj tre diligente lernis kaj ricevis multajn konsilojn kaj lernmaterialojn, per kiuj ili povos mem daŭrigi la lernadon ĝis sekva kurso en Interkultura Centro Herzberg 11-13 junio 2010. Kromajn kursofertojn vi trovas en la Programkalendaro 2010.

Kunveno pro 100-jara historio

Sat, 27 Mar 2010 17:37:16 +0100

Okazis kunveno en la urbodomo kun la ĉeesto de urbestro Gerhard Walter, lokaj politikistoj, reprezentantoj de Interkultura Centro Herzberg kaj s-ro Baitz, nepo de apotekisto, kies avo estis unu el la fruaj Esperantistoj en Herzberg am Harz. En tiama regiona gazeto Kreis Zeitung estis trovita pri li artikolo, kiu aperis antaŭ 100-jaroj, la 10an de marto 1910. Dum la vespero s-ro Baitz parolis pri sia avo, Peter Zilvar resumis la historion de Esperanto kaj parolis pri Esperanto-agado en Herzberg. Jen kelkaj fotoj pri la informriĉa vespero.

Lerneja kunagado

Thu, 25 Mar 2010 02:23:19 +0100

Comenius-projekto finiĝos en 2010 post 2-jara kunlaboro inter bazlernejoj en tri landoj: Bar Hill (Britio), Miskolc (Hungario) kaj Herzberg (Germanio).
La Esperanto-kursanoj el la partnerlandoj prezentos kantojn, fotojn, filmojn kaj kunagados en la plej diversaj formoj dum tiu lasta kunveno. Detaloj pri tiu sukcesa projekto sub menupunkto Comenius. Publika prezentado, adiaŭa vespero: 12.04.2010, de la 14-a horo en Nicolai-lernejo.

Baptita trajno

Mon, 22 Mar 2010 00:29:52 +0100

Interesa festo okazis en Herzberg ĉe la stacidomo. Unu el la regionaj trajnoj ricevis la nomon "Herzberg" en baptoceremonio. Festparolis urbestro Gerhard Walter, kiu anoncis ankaŭ, ke baldaŭ okazos kompleta renovigo, modernigo de la stacidomo. En la festevento partoprenis ankaŭ komisiito de GEFA (Germana Esperantista Fervojista Asocio) kaj reprezentantoj de Interkultura Centro Herzberg. (Raporto en la germana lingvo aperis sur la hejmpaĝo de Herzberg.)
Estas unikaĵo en la stacidomo, ke apud la ŝildo de la urbo Herzberg aperas ankaŭ ŝildo kun la oficiala kromnomo: la Esperanto-urbo. Estas bonega varbilo por nia lingvo. Jen fotoj en la albumo.

Gimnazia kunlaboro

Sat, 20 Mar 2010 15:32:20 +0100

Kunlaboro realiĝis kaj daŭras jam kelkajn jarojn dank' al Esperanto kaj la perada laboro de Esperanto-instruistino Zsófia Kóródy, kiu kunligis sian iaman gimnazion en Budapest kun gimnazio en la Esperanto-urbo. Enkadre de tiu partnereco nun grupo de gimnazianoj el Hungario vizitis sian partnerlernejon en Herzberg am Harz, rigardis la urbon, la Zamenhof-ekspozicion en la kastelo, kie akceptis ilin urbestro Gerhard Walter. En la programo estis ankaŭ ekskursoj al la belaj, historiaj najbaraj urboj kaj amikaj kunvenoj kun la gastfamilioj. Jen kelkaj fotoj en nia albumo.

Nokta vizitanto!

Wed, 17 Mar 2010 01:24:33 +0100

Nekutima gasto aperis en vintreca nokto sur la teraso de Interkultura Centro Herzberg. Certe de la proksima Nacia Parko Harz. Ĉu ankaŭ ĝi aŭdis jam, ke baldaŭ okazos intensa semajnfina kurso (26-28.03.) kaj venis por eklerni Esperanton??? Vidu ĝin ĉi tie.

Skype-parolado ene de Comenius-projekto

Thu, 11 Mar 2010 19:46:15 +0100

Enkadre de Comenius-projekto sukcesa skype-parolado okazis hodiaŭ inter la Esperanto-grupeto en Nicolai bazlernejo (Herzberg am Harz, Germanio) kaj Springboard lernejo en Bar Hill (apud Cambridge, Britio). La 7-10 jaraj infanoj prezentis sin en Esperanto, salutis unu la alian kaj kantis kantojn. Ili ekzercis mallongajn konversaciojn por pli bone interkompreniĝi en aprilo, kiam kune kun la tria partnero, Esperanto-lernantoj el bazlernejo en Miskolc (Hungario) ili partoprenos la finan renkontiĝon de la 2-jara projekto. Jen belaj fotoj en nia albumo.

100-jara jubileo de Esperanto en Herzberg

Wed, 10 Mar 2010 16:45:24 +0100

10.03.1910 - aperis gazetartikolo en la regiona gazeto Kreis-Zeitung, kiu alvokas al fondo de Esperanto-kluboj en la Suda Harz-montaro kaj anoncas kunvenon en Herzberg am Harz! Ĵus estis retrovita la arkivmaterialo en la urba arkivejo. Bela jubileo!
10.03.2010 - la Esperanto-klubo en Herzberg organizis specialan klubkunvenon por memori tiun 100-jaran eventon. La 25an de marto okazos memorfesto en la urbodomo kun invititaj gastoj ankaŭ el la iamaj esperantistaj familioj, kies nomoj estis menciitaj en la artikolo.
Historian resumon en la germana lingvo bv. legi sur la hejmpaĝo de Herzberg http://herzberg.de (Aktuelles) aŭ ĉi tie.

Pola delegacio

Wed, 10 Mar 2010 16:42:43 +0100

Semajnfine kvarmembra delegacio de fervojistoj vizitis la Esperanto-urbon el Pollando. Urbestro Gerhard Walter akceptis la gastojn el Bjalistoko kaj Poznan en la urbodomo. Ili rondpromenis en Herzberg kaj aparte rigardis la Esperantlingvajn bonvenigŝildojn, informtabulojn. Dum ilia vizito en la Esperanto-Domo kaj biblioteko ili konatiĝis kun la laboro de Interkultura Centro Herzberg. Pri la eventoplenaj tagoj vidu fotojn en la albumo.

EMAS-tago en Nienburg

Sun, 07 Mar 2010 21:03:00 +0100

En Nienburg okazis unutaga renkontiĝo de Esperanto-Ligo de Malsupra Saksio (EMAS). La partoprenantoj ĝuis la amikan kunestadon, babiladon, komunan tagmanĝon kaj partoprenis en gvidata urborigardado. Al la faka programo kontribuis Interkultura Centro Herzberg per komputila prezentado de historiaj materialoj, bildoj pri Zamenhof kaj lia familio, kaj per raporto pri Esperanto-projektoj en la lernejoj kaj en la Esperanto-urbo Herzberg am Harz. Restis tempo ankaŭ por trovi interesaĵojn en la porokaza librobutiko kaj diskuti pri movadaj aktualaĵoj, planoj. Fotoj pri la bela urbo kaj bonetosa kunveno estas en nia fotoalbumo.

Multlingva retpaĝaro de la Esperanto-urbo

Fri, 05 Mar 2010 23:43:54 +0100

Jam en multaj lingvoj estas legebla kaj deŝutebla prezentadmaterialo kun belaj fotoj pri Herzberg - la Esperanto-urbo, allogaĵoj de la regiono kaj pri la multflanka agado de Interkultura Centro Herzberg. La internacian projekton pri plurlingvigo de bazaj informoj sur la retpaĝaro kunordigas Zsófia Kóródy: pri tio ĵus aperis gazetartikolo en la regiona gazeto Harz Kurier.
Utiligu la nacilingvajn informojn pri Herzberg am Harz, varbu pri tiu grava atingo de la Esperanto-movado inter ne-esperantistoj en via urbo, regiono, en via loka gazetaro. (Se la teksto en iu lingvo ne estas bone legebla, bv. ŝanĝi la kodigon en via krozilo.)

Klubvespero

Wed, 24 Feb 2010 21:51:58 +0100

11 kursanoj-klubanoj partoprenis la hodiaŭan lecionon kun Zsofia. Lernado de novaj vortoj, vortludoj kaj malgrandaj rakontoj amuzis la partoprenantojn. Unu el la ŝercaj taskoj estis verki historieton el hazarde elektitaj vortoj. Ne mankis manĝaĵetoj kaj aldoniĝis speciala frukto-trinkaĵo. Vespero kun bonetoso!

KD - Esperanto-urbo kantas

Mon, 22 Feb 2010 01:12:59 +0100

Interkultura Centro Herzberg eldonis kompaktdiskon kun la titolo "Herzberg - la Esperanto-urbo kantas 2". La unua el la serio aperis en 2008 kaj enhavis kantojn en traduko de Joachim Gießner.
La nova, dua disko estas pretigita enkadre de la Vielfalt tut gut (Bunteco bonas) ministeria projekto por toleremo kaj kontraŭ rasismo.
Detalojn, fotojn pri la projekto kaj la KD vi povas havi per nia speciala projekt-paĝaro.

Karnavalo en Herzberg/P�hlde

Sat, 20 Feb 2010 00:43:42 +0100

Grupo de Esperanto-amikoj, klubanoj, kunlaborantoj de Interkultura Centro Herzberg partoprenis en la tradicia strat-karnavalo en Pöhlde, urboparto de Herzberg am Harz. La kunportitaj verdaj varbombreloj bone reklamis por Esperanto, multaj rimarkis ilin en la procesio. Venu kaj partoprenu en la festo en 2011!
Fotojn vi trovas en la fotoalbumo, pri la bunteco, bona etoso, vigla muziko jen mallonga filmo (c. 7 MB, .wmv).

Sukcesa kurs-semajnfino

Thu, 18 Feb 2010 23:35:25 +0100

Entuziasmaj lernemuloj pasigis bonetosan semajnfinon en la Esperanto-urbo kaj lernis multon dum la intensa kurso. Multon ili atingis en malmulte da tempo: la tuttempa uzo de Esperanto, la konstanta konversaciado helpis evoluigi la lingvajn kapablojn, gramatiko, vortprovizo estis plibonigataj per helpo de spertaj kursgvidantoj (Petro kaj Zsófia). Jen kelkaj fotoj en la fotoalbumo.
Ne mankis ludoj, amuzado, gimnastiko kaj urborigardado. Daŭrigo promesate! Sekva kurs-semajnfino: 26-28. marto. Bonvenon al ĉiuj!

Mesaĝo al virinoj

Thu, 11 Feb 2010 01:37:21 +0100

Okaze de la proksimiĝanta Internacia Tago de Virinoj en la Kastelo de Herzberg estis festvespero por virinoj. Ĝin organizis sekretariino de la urbodomo, respondeculo pri virina egalrajteco.
La ĉeftemo de la festprogramo estis: Malantaŭ ĉiu granda viro staras eĉ pli granda virino
Al la programo kontribuis Interkultura Centro Herzberg per Pli...

Jarkalendaro

Mon, 08 Feb 2010 02:37:41 +0100

Abunda tutjara programo por 2010 estas trovebla en la nova PROGRAMKALENDARO. Germana Esperanto-Centro/Interkultura Centro Herzberg (GEC/ICH) ankaŭ en tiu ĉi jaro organizas multajn interesajn, allogajn programerojn, lingvokursojn, studsesiojn (klerigmodulojn) por instruemuloj, interesitoj; klubkunvenojn, ekskursojn, lernejajn projektojn, fakajn renkontiĝojn kun prelegoj, ktp. Venu, vidu, spertu!

Gazetartikoloj

Sun, 07 Feb 2010 03:22:56 +0100

La katalogo de gazetartikoloj pri Esperanto-agado en Herzberg estas refreŝigita. Ĝi enhavas ĉiujn skanitajn gazetartikolojn, kiuj aperis en lokaj kaj regionaj gazetoj ekde 1972. Ankaŭ en freŝa formo estas legebla la listo de artkoloj, kiu enhavas la titolon de la artikolo, la subtitolon kaj mencias, ĉu la artikolo aperis kun aŭ sen foto. Ĝi estas elŝutebla en .pdf-formato (86 Kb)
La artikoloj de la lastaj 3 jaroj estas videblaj en albumoj ĉe http://esperantourbo.spaces.live.com/ Bonan legadon, rigardadon!

Intensa lingvokurso

Sat, 30 Jan 2010 03:01:02 +0100

Kursoj por komencantoj, komencintoj, konversaciemuloj. Ankaŭ individua helpo, konsilado pri gramatiko. Intensa lernado en veraj viv-situacioj. Lernado, konversaciado dum farado. Plibonigo de parolkapablo, lernado de vortoj per ludoj!
Dato : 12-14.02.2010, 16 instruhoroj
Kurskotizo : 40 EUR, rabato por asociaj membroj kaj gejunuloj.
Loĝado : Favore en la Esperanto-domo aŭ en Esperanto-volontulejo (moderna, bone ekipita loĝejo), aŭ ni povas helpi trovi por vi feriodomon, hotelĉambron en la urbo.
Laŭeble kunportu dormosakon.
Kursmaterialoj ne kostos. Libroservo kun favoraj prezoj je dispono.
Kursgvidantoj : Peter Zilvar kaj Zsófia Kóródy (diplomita Esperanto-instruistino, estrarano de ILEI)
Reta aliĝilo : http://ic-herzberg.de
Vesperaj, libertempaj amuzaĵoj, muziko, filmoj en Esperanto. Urborigardado en Esperanto-urbo: http://herzberg.de
Informoj: http://esperanto-urbo.de
Kontakto : esperanto-zentrum@web.de

Adiaŭo kun supo

Wed, 27 Jan 2010 00:51:11 +0100

Hungara gulaŝ-supo por koreaj gastoj: la klubanoj kaj kunlaborantoj de Interkultura Centro Herzberg adiaŭis la korean familion, kiuj staĝis en Herzberg dum januaro. Kantado, plora adiaŭo post sukcesa, ĉiutaga lingvolernado, klerigado kaj multaj jarkomencaj eventoj en la Esperanto-urbo. Fotoj en la albumo.

Klubkunveno kun korea vespero

Thu, 21 Jan 2010 01:12:05 +0100

Merkredo estas la regula kunventago por Esperanto-kursanoj, klubanoj, amikaro en Interkultura Centro Herzberg. La unua kunveno en 2010 allogis multajn partoprenantojn, kiujn la gastoj el Koreio regalis per memkuiritaj specialaĵoj. Ĉiuj multe ĝuis la lingvajn lecionojn kun tiutipa speciala interkultura spertiĝo. Fotojn pri la interesa, bonetosa vespero vi povas vidi en la Fotoalbumo.

Zamenhof-ekspozicio en la kastelo

Fri, 15 Jan 2010 18:08:28 +0100

En la kastela muzeo estas videbla ekspozicio dediĉata al d-ro Zamenhof, iniciatoro de Esperanto. Ĝi pretiĝis por la 150a datreveno de lia naskiĝtago kaj estis oficiale malfermata de urbestro Gerhard Walter komence de januaro 2010. Pli...

Festotagoj

Thu, 24 Dec 2009 04:35:04 +0100

NI DEZIRAS AGRABLAN KRISTNASKON, BELAJN FESTOTAGOJN KAJ FELIĈAN, SUKCESAN NOVAN JARON!
JARO 2009 ESTIS EVENTO- KAJ REZULTOPLENA. EN 2010 NOVAJ DEFIOJ ATENDAS NIN. Pli...

Decembraj eventoj

Tue, 22 Dec 2009 05:12:57 +0100

Bona helpo en bona momento
La multflanka klerig- kaj instrulaboro, varbado por Esperanto en Herzberg – la Esperanto-urbo havis novajn atingojn en decembro. Al la farendaĵoj estis ricevita helpo de pluraj bonvolemaj helpantoj. Pli...

Zamenhof-monumento inaŭgurita

Thu, 17 Dec 2009 03:46:20 +0100

La 15an de decembro por festi la 150an naskiĝtagon de la iniciatoro de lingvo Esperanto estis inaŭgurita monumento al Ludoviko Zamenhof en Herzberg am Harz - la Esperanto-urbo. Sur la monumento la tekstoj estas en kvar lingvoj: en la germana, en la ĉina, en la pola kaj en Esperanto.
La blanka marmora busto kun la nigra postamento estis pretigitaj en Ĉinio, la starigo sponsorita de Esperanto-amikoj, kluboj el la tuta mondo. Koran dankon al ĉiuj, kiuj kontribuis al la realigo de tiu projekto!
Fotoj estas videblaj pri la inaŭguro kaj la festprogramo en la kavalira salono de la kastelo. Bv. rigardi la fotoalbumon.

Bunteco bonas - Vielfalt tut gut

Tue, 15 Dec 2009 03:24:47 +0100

La Esperanto-kantgrupo 'Buntaj birdoj' aktivis ankaŭ en decembro. La projekto Vielfalt tut gut - Bunteco bonas proksimiĝas al sia fino:
1. okazis bonsukcesa, festa kantvespero en Villa Juesheide, kie la maljuna aŭskultantaro ne nur ĝuis la belajn kantoj sed ofte kunkantis la konatajn melodiojn. Aplaŭdo kaj memfaritaj kukoj estis la danko al la internacia, diversaĝa kantantaro.
2. komenciĝis la registrado de la plurlingva kanto-bukedo, kiujn la projektpartoprenanta kantogrupo havas en sia repertuaro.
Bildojn vi vidas en nia fotoalbumo.

43a Studsesio kun Zamenhof-festo

Fri, 04 Dec 2009 02:48:01 +0100

Aktualan temon, la vivon kaj multflankan agadon de Zamenhof traktos la 43a Studsesio inter 11-13 decembro. Gasto el Britio, Heleno Fantom estos la ĉefrolanto en tiu sesio: literaturo, dramo kaj muziko rilate al Zamenhof - varia programo, al kiu aldoniĝos prelego de Peter Zilvar: Zamenhof en historiaj materialoj, arto kaj kolektaĵoj. Zsófia Kóródy informos pri Zamenhof-monumentoj kaj pri la familio de Zamenhof.
Tiuj, kiuj restos ĝis la 15a de decembro, povos ĝui la specialan jubilean etoson en Herzberg - la Esperanto-urbo: ĉeesti la inaŭguran ceremonion de la unua Zamenhof-monumento en Germanio, partopreni la festprogramon en la Kavalira Salono, aŭskulti la festprelegon de Aleksander Korĵenkov okaze de la 150-a naskiĝtagdatreveno de la iniciatoro de Esperanto kaj viziti la Esperanto-angulon en la kastela muzeo kun ekspozicio dediĉita al Zamenhof.
La detala programo de la studsesio estas ĉi-tie.

Zamenhof-festo kaj monumento

Sat, 21 Nov 2009 01:46:11 +0100

Bela Zamenhof-festo estas preparata en Herzberg am Harz por digne memori la 150-an naskiĝtag-datrevenon de la iniciatoro de Esperanto. Ĝi okazos en la 15a de decembro, inter 12-16a horoj. Koran bonvenon!
12:00 gazetara konferenco en la kavalira salono de la kastelo
13:00 inaŭguro de la Zamenhof-monumento en centra parto de Herzberg - la Esperanto-urbo, muziko
14:00 festprogramo
15:00 akceptado kun ŝaŭmvino, bufedo
Jen detala programo en la germana, pola kaj en Esperanto lingvoj.

Soroban-lecionoj kaj origamio

Fri, 20 Nov 2009 18:19:48 +0100

Fine de oktobro-komence de novembro 2 semajnojn pasigis en Herzberg Kimie Markarian el Britio. Ŝi venis por helpi instruadon de Esperanto en la lernejoj kaj per volontula laboro subteni la multflankan Esperanto-agadon en la Esperanto-urbo.
Ŝi prezentis kiel oni kalkulas per sorobano (japana kalkulilo), kaj per sia propre ellaborita kalkulmaniero donis praktikan helpon al la lernantoj por plifaciligi bazan matematikon. Krom la lernejaj horoj ŝi havis okazon mallonge prelegi ankaŭ al la matematikinstruistoj de la gimnazio. Dank' al la sorobanoj donacitaj de la Japana Sorobano-Instituto ĉiuj ŝiaj kursanoj povis ekzerci per propra kalkulilo.
Tre ŝatataj estis ankaŭ ŝiaj lecionetoj pri paperfaldado (origamio) kaj en la lernejoj kaj en la loka Esperanto-klubo. Ŝia helpo estis tre utila ankaŭ en la ĉiutaga vivo de nia Esperanto-centro.
Kelkajn fotojn pri ŝiaj interesaj, sukcesaj prezentadoj, gazetartikolojn el la regiona gazeto vi trovas en nia fotoalbumo.

Trilanda Comenius-projekto 2008-2010

Mon, 19 Oct 2009 02:40:37 +0200

Inter 17-20 oktobro okazis la dua renkontiĝo de lernejanoj el Bar Hill (Britio), Herzberg am Harz - la Esperanto-urbo (Germanio) kaj Miskolc (Hungario) enkadre de Comenius-projekto.
La tre sukcesan kunlaboron de infanoj, instruistoj kaj gepatroj plej bone prezentas la fotoj, filmetoj faritaj dum la bonetosa, programriĉa 4-taga vizito al Miskolc, al la hungaraj projektpartneroj en Komlóstet�i Általános Iskola.

Jen kelkaj bildoj, aliaj sekvos.
Jen raporto pri la trilanda renkontiĝo en Miskolc (Stefan MacGill, .pdf)
Jen televida raporto pri la evento (Miskolc TV, 5,3 Mb)

Sukcesa Torpedo-5

Fri, 16 Oct 2009 02:02:28 +0200

50 partoprenintoj dum la semajnfina (9-12.oktobro) pedagogia renkontiĝo (Torpedo-5) en Herzberg am Harz!

Jen raporto pri la pedagogiaj-metodikaj tagoj kun tre sukcesa aldona instruista trejnado enkadre de internacia Grundtvig projekto.
Bv. rigardi nian fotoalbumon.
Foto-raporto de Andrzej Sochacki
Gazetartikolo aperinta en Harz Kurier.

Torpedo 5 kun Grundtvig-projekto

Thu, 08 Oct 2009 22:47:53 +0200

En 2009 jam la kvinan fojon okazos Tutlanda Oktobra Renkontiĝo Pedagogia (TORPEDO-5) en Herzberg am Harz - la Esperanto-urbo. Kiel kutime, ankaŭ nun multaj interesaj fakprelegoj, programoj atendas la partoprenantojn. Kiel novaĵo aldoniĝas partopreno de pola grupo, kiuj enkadre de Grundtvig projekto, subvenciata de EU en la Dumviva Lernado programo, alvenos por tutsemajna instruista trejnado.

La organizadon, fakan programon - kiel projektpartnero respondeca pri la klerigado - prizorgas Peter Zilvar kaj Zsófia Kóródy. Multaj famaj prelegantoj, metodikistoj, instruistoj, konataj fakuloj el la Esperanto-movado venas por instrui, prezenti, gvidi la seminariojn:
Katalin Kováts (edukado.net), Stefan MacGill (prezidanto de ILEI), Gerald Tucker (fakestro de Germana Esperanto-Instituto), Lidia Ligeza (Krakovo/Poznano), Peter Balaz kaj Jevgenij Gaus (E@I).

Jen priskribo de la projekto.
Jen la programo de TORPEDO-5.
Jen 4-taga programo (Grundtvig-projekto)
Jen la nomlisto de partoprenantoj.

Tagoj de Kolektantoj

Mon, 05 Oct 2009 01:26:18 +0200

La prezidantino de ELF (Esperanto-Ligo por Filatelio) kaj AREK (Amika Rondo de Esperanto-Kolektantoj) s-ino Elda Dörfler el Triesto en Italio bonvenigis ĉ. 15 gekolektantojn el 5 landoj. Estis la unua internacia kunveno de kolektantoj rilate al filatelo, medaloj, glumarkoj, malnovaj bildkartoj, fotoj, insignoj, ktp. Okazis prelegoj, prezentadoj kaj interŝanĝo de diversaj kolektitaj materialoj.

Memormedaloj

Tue, 14 Jul 2009 02:05:03 +0200

Memormedaloj

La fama germana artisto Peter Götz Güttler kreis por Germana Esperanto-Centro / Interkultura Centro Herzberg (ICH) du memormedalojn.

1) Medalo okaze de la 2-a naskiĝtago de Esperanto-urbo (12.07.2008)

mezuroj: diametro ĉ. 11 cm pezo ĉ. 300 g materialo: bronzeca metalo

Teksto: sur la frontflanko: Saluton el Herzberg 2008 Kastelo de la Welf-familio

sur la dorsflanko: La Esperanto-urbo Herzberg am Harz - Die Esperanto-Stadt - Kromnomo de 12.07.2006

bildo: sur la frontflanko: la kastelo de Herzberg ĉirkaŭita de 5-pinta stelo

sur la dorsflanko: blazono de urbo Herzberg (leono kaj cervo)

2) Medalo okaze de la 3-a naskiĝtago de Esperanto-urbo (12.07.2009) kaj Zamenhof-jaro

mezuroj: diametro ĉ. 10,5 cm pezo: ĉ. 400 g materialo: bronzeca metalo

Teksto sur la frontflanko: Ludoviko Lazaro Zamenhof - (1859-1917) Kreinto de Esperanto 150-a naskiĝtago 15-a de Decembro 2009

sur la dorsflanko: same kiel sur medalo 1

bildo sur la frontflanko: portreto de Zamenhof
sur la dorsflanko: same kiel sur medalo 1

Fotojn de la belegaj medaloj vi povas vidi en nia Fotoalbumo.

Dum GEK - EEK 2009 Peter Zilvar en Herzberg - la Esperanto-urbo povis honorigi nome de GEC/ICH urbestron Gerhard Walter pro la sukcesa lobiado por "Herzberg - la Esperanto-urbo" per la belega artisma Zamenhof-medalo. Same d-ro Rudolf Fischer (prezidanto de GEA) pro la kelkjardeka aktiva kaj sukcesa agado estis distingita per la medalo de la artisto Peter Götz Güttler.

Nobel-premiito Selten en G�ttingen

Thu, 09 Jul 2009 00:52:40 +0200

Okaze de la distingo de honordoktora titolo al Nobel-premiito prof-ro Reinhard Selten far la ekonomia fakultato de la Universitato Göttingen partoprenis i.a. kelkaj membroj de Esperanto-Societo Südharz.
En la laŭdado prof-ino Claudia Keser (kiu iam eklernis Esperanton), diris kelkajn frazojn en bonkvalita Esperanto al la tuta aŭskultantaro.
Partoprenis multaj eminentaj profesoroj el Germanio kaj eksterlando. Dum la festo oni kelkfoje menciis Esperanton kaj sian fakprelegon prof-ro Selten mem komencis en la internacia lingvo.
Peter Zilvar el Herzberg am Harz - la Esperanto-urbo gratulis la profesoron pro la eksterordinara honorigo ankaŭ je nomo de Interkultura Centro Herzberg (ICH), fak-kunlaborantino Zsófia Kóródy gratulis ankaŭ je nomo de la filio de Germana Esperanto-Asocio en Herzberg kaj transdonis malgrandan memoraĵon el la Esperanto-urbo.

En nia galerio: Fotoalbumoj vi vidas kelkajn bildojn pri la fest-evento, pri la Nobel-premiito kune kun ICH-membroj.
Pliaj informoj en Göttinger Tageblatt (en la germana) kun mencio de Esperanto:
http://www.goettinger-tageblatt.de/Nachrichten/Wissen/Regionale-Wissenschaft/Prof.-Reinhard-Selten-von-Wirtschaftwissenschaften-gewuerdigt

Juniaj eventoj

Tue, 30 Jun 2009 03:51:45 +0200

27. 06: Festo en la Parko: la Internacia Esperanto-Koruso kantis en la familia festo organizita de loka asocio Zukunftswerkstatt en Domeyer Park enkadre de la 'Vielfalt tut gut' (Bunteco bonas) projekto.
Jam la trian fojon ni partoprenis tiun lokan iniciaton kaj varbis por Esperanto ĉe informtablo, prezentis bazan gramatikon per montro-tabulo, ofertis kartludojn kaj desegnadon por infanoj. Ĉi-jare aldoniĝis kantado en Esperanto, ja per tio Interkultura Centro Herzberg partoprenas en tutlanda projekto subvenciata de la Ministerio por Familioj, Maljunuloj, Virinoj kaj Junularo.

18-19.06: Projekt-tagoj en la gimnazio. bona etoso kun fruktodona instruado.
28 gejunuloj elektis Esperanton por konatiĝi kun tiu ĉi lingvo, lerni bazan konversaciadon kaj informiĝi pri la uzebloj internaciskale. En ambaŭ tagoj dum 5 instruhoroj Zsófia Kóródy gvidis la grupon kun helpo de Peter Zilvar kaj juna gimnazia instruisto Christopher Koch. La lecionojn vigligis kart- kaj domenludoj, aktivigaj taskoj, rigardado de DVD-filmoj, prezentado de esperantlingvaj libroj, gazetoj, broŝuroj, varb- kaj informmaterialoj, turismaj prospektoj pri Herzberg - la Esperanto-urbo, ktp. La partoprenantoj ne nur lernis prezenti sin, sed ankaŭ verkis siajn unuajn leterojn en Esperanto.

Esperanto-kongreso en Herzberg

Sun, 07 Jun 2009 21:34:40 +0200

Inter 28.05-03.06 okazis en Herzberg la 8a Eŭropa Esperanto-Kongreso kaj la 86a Germana Esperanto-Kongreso kun la ĉeftemo "Esperanto por multkultura Eŭropo". Partoprenis ĉ. 400 gastoj el 27 landoj, okazis multaj prelegoj, kunsidoj, lingvokursoj, ekzamenoj, kulturaj eventoj, prezentadoj de kantistoj, muzikistoj, teatra vespero, diskoteko, junularaj programoj, ekskursoj, urba festo kun marŝado, kaj multo pli!
Kelkajn fotojn vi povas jam vidi en nia fotoalbumo.

Raporto, fotoj pri la interesaj eventoj, partoprenantoj, ktp. de la kongreso, pri vidindaĵoj kaj ZEO-j en Herzberg, pri la bunta urba festo kun bona reklamo por Esperanto kaj aliaj belaj bildoj estas videblaj sur la kongresa hejmpaĝo http://gek-eek.esperanto-urbo.de , menuo Raportoj

Ekspozicio en la kastelo antaŭ GEK-EEK

Sat, 23 May 2009 20:44:44 +0200

Interkultura Centro Herzberg organizis ekspozicion pri la historio kaj nuntempa uzo de Esperanto en la kastelo de Herzberg. La inaŭguro okazis 10 tagojn antaŭ la 8a Eŭropa Esperanto-Kongreso kaj 86a Germana Esperanto-Kongreso, tiel ankaŭ la loka publiko havos tempon lerni pri la lingvo, ĝia historio kaj pri nuntempaj agadoj per Esperanto, kiel ekzemple la kunlaboro inter Herzberg kaj la ĝemelurbo Góra.
Urbestro Gerhard Walter inaŭguris la ekspozicion en la ĉeesto de lokaj politikistoj kaj s-ro Bötel, direktoro de la regiona gimnazio, la kongresejo de la grava renkontiĝo de la ĉ. 400 Esperanto-parolantoj venontaj al Herzberg el 28 landoj inter 28.05-03.06.
Fotojn vidu en la Fotoalbumoj.
Germanlingva artikolo aperis en la regiona gazeto Harz Kurier, la artikolon vi povas legi ĉi tie.
(Dankon pro la sindona laboro al la ICH-teamo: Peter Zilvar, Zsófia Kóródy, helpantoj, volontuloj.)

Monumento por Herzberg

Mon, 04 May 2009 00:43:55 +0200

Donacu ŝtoneton por monumento en Herzberg - la Esperanto-urbo

La franca esperantisto kaj entreprenisto Michel Basso volas konstrui en junio 2009 en la urbo Herzberg am Harz du belajn grandajn monumentojn "Espero" kaj "Esperanto".
Li bezonas por la betonkrustoj de la monumentoj ŝtonetojn el la tuta mondo por esprimi la mondsolidarecon al la oficiala Esperanto-urbo Herzberg am Harz.
Bv. sendi ŝtonetojn ĝis ĉ. ovo-grandeco el via urbo resp. regiono per poŝto al Herzberg - la Esperanto-urbo aŭ bv. persone transdoni al Michel Basso dum la Germana kaj Eŭropa Esperanto-Kongreso en Herzberg (28.05-03.06.2009).
La adreson vidu ĉe Kontaktoj, la skizon pri la monumento ĉi tie.
Anticipan dankon!

Agrablan Pasko-feston!

Sun, 12 Apr 2009 01:50:39 +0200

Belan printempon, feliĉan Pasko-feston!

Jen murpentraĵo far loka artisto Dieter Utermöhlen sur la muro de Interkultura Centro Herzberg.

Kaj jen paska donaco por vi: Tiuj, kiuj aliĝos ĝis la 15-a de aprilo 2009 povos partopreni je favora kongreskotizo en la Eŭropa Esperanto-Kongreso kaj Germana Esperanto-Kongreso (28.05-03.06.2009) laŭ la kategorio "ĝis la 31a de marto 2009". Poste ni malŝaltos tiun eblon sur la kongresa hejmaĝo: http://gek-eek.esperanto-urbo.de

Inaŭguro de tabulo dum Karnavalo

Wed, 25 Feb 2009 09:06:44 +0100

Je la 23-a de februaro 2009, t.n. "Rozolundo" okazis en la urboparto Pöhlde la oficiala inaŭguro de la novaj lignaj bonvenigtabuloj "Bonvenon en Pöhlde". Sur la dorsoflanko oni povas legi "Ĝis revido".

Esperanto-geamikoj el la Esperanto-urbo rendevuis kun la plej gravaj karnevalistoj de la vilaĝo. Salutis nin la prezidanto de la karnavala klubo Ulli Müller kaj la karnavala princo-paro en vere elegantaj velurroboj. La festomarŝo en tiu ĉi vilaĝo havas jam longan tradicion kaj altan nivelon. Ankaŭ ĉi-jare estis ĝojiga kaj gaja kunveno kun parado de multaj ornamitaj ĉaroj, muziko, dancado surstrata.

Bonvolu rigardi niajn fotoalbumojn pri tiuj eventoj.

Ni invitas vin partopreni la karnavalon en 2010 en Herzberg am Harz - Pöhlde.

Halina Komar, prezidantino de Pola E-Asocio en Herzberg

Fri, 13 Feb 2009 23:50:08 +0100

Komence de februaro Halina Komar venis al Herzberg por priparoli komunan agadon enkadre de Grundtvig-projekto (en la 'Dumviva lernado' programo de la Eŭropa Parlamento kaj de Eŭropa Konsilio). Ŝi konsultiĝis kun la gvidantoj de Interkultura Centro (ICH), partoprenis urborigardadon kaj vizitis Esperanto-instruhoron en loka lernejo.
Ŝi estis oficiale akceptita de urbestro Gerhard Walter en la urbodomo, kie ŝi donis intervjuon al la regiona gazetaro.
Fotojn ni metis en nian albumon.
Pri la vizito aperis longa artikolo kun foto en Harz Kurier (legu ĉi tie: originala artikolo en la albumo Gazetartikoloj 2009, kaj la esperanta traduko).

Bondeziro de infanoj

Fri, 26 Dec 2008 21:14:52 +0100

La Esperanto-grupeto de Nicolai-lernejo, kiu gajnis Comenius-projekton kun Springboard lernejo en Bar Hill (Cambridge) en Britio kaj bazlernejo en Miskolc, Hungario, sendas kristnaskajn kaj novjarajn bondezirojn al la partneroj kaj al ĉiuj Esperantistoj!
Feliĉan novan jaron, sukcesojn en 2009! La filmeton vi trovas ĉi tie (12MB, .avi).

Festajn bondezirojn!

Tue, 23 Dec 2008 20:31:51 +0100

Ni deziras agrablajn festotagojn, belan Kristnaskon, sukcesojn en la nova jaro 2009, realiĝon de ĉiuj viaj revoj, deziroj!

Kun koraj salutoj el Herzberg, invitante vin vidi la belan, verdiĝantan urbon, kie Esperanto estas paŝo post paŝo pli videbla, pli ofte uzata, utiligata.
Atendante ankaŭ vian partoprenon ĉi tie en la Germana kaj Eŭropa Esperanto-Kongreso dum Pentekosto (28.05-03.06.2009).

Vidu ankaŭ la apartan retpaĝaron: http://gek-eek.esperanto-urbo.de

Korajn salutojn de
Zsófia Kóródy, Peter Zilvar kaj la teamo de Interkultura Centro Herzberg (ICH)